Новости
Общество

Сириаг Арабаг Республикӕйы рауадзгӕ продуци уӕйгонд цӕудзӕн Хуссар Ирыстоны

Хицауады сӕрдары хӕдивӕг - экономикӕйы райрӕзты министр Бекъойты Геннадий ӕмӕ Сириаг Арабаг Республикӕйы  экономикӕйы  ӕмӕ ӕддагон базарады министр Самер Аль Халиль бадзырд бафыстой Хуссар Ирыстон  ӕмӕ Сириаг Арабаг республикӕйы  дуканитӕ бакӕныныл. Уым   уӕй   кӕндзысты Сири  ӕмӕ Хуссар Ирыстоны рауадзгӕ продукцитӕ. Уагъд цӕудзӕн алыгъуызон  равдыстытӕ ӕмӕ презентацитӕ.
"Мах кусӕм Хуссар Ирыстон ӕмӕ Сирийы президенттӕ  цы бадзырдтӕ бафыстой, уыдон  царды ныббиноныг  кӕныныл. Дыууӕ бӕстӕйы   ӕхсӕн ахастытытӕ фидар кӕнынц алы фадгуыты. Ацы дуканитӕ  бакӕныны хъуыддаг та  ахъаз уыдзӕн  нӕ  ахастытӕ ног ӕмвӕзадмӕ ракӕнынӕн", - банысан кода экономикӕйы райрӕзты министр Бекъойты Геннадий.
Сирийы экономикӕйы райрӕзты ӕмӕ ӕддагон базарады министр Самер Аль–Халиль банысан кодта ,Сирийӕн  ахсджиаг кӕй у Хуссар Ирыстонимӕ экономикон бастдзинӕдтӕ  сфидар кӕнын. 
"Нӕ  бӕстӕтӕн  уавӕртӕ   ис ӕмгуысткӕнынӕн.   Мах стыр къахдзӕф сарӕзтам ацы хъуыддаджы. Хуссар Ирыстон  ӕмӕ Сириаг Арабаг Республикӕйы   ис ахӕм продукци ,кӕцы бацымыдис кӕндзӕн нӕ адӕмты,"-  банысан кодта Сириаг Арабаг Республикӕйы экономикӕйы райрӕзты ӕмӕ ӕддагон базарады министр Самер Аль –Халиль.
Хуссар Ирыстон ӕмӕ Сириаг Арабаг Республикӕты  ӕхсӕн хӕлардзинад ӕмӕ ӕмгуысткӕнынады фӕдыл  бадзырд бафыст ӕрцыд 2018 азы.  Бадзырдыл  сӕ къухтӕ  бафыстой дыууӕ  бӕстӕйы   сӕргълӕуджытӕ    президент  Бибибылты Анатолийы кусӕгон балцы рӕстӕджы. 

 

31.08.2019